Gibraltar -- ei oppsummering Det britiske oversjøiske territoriet Gibraltar er verdt eit besøk. Det er mykje historie rundt om på klippa og elles i byen. Temperaturen var ikkje så verst med litt over tjue grader og ein sval bris frå havet. Gibraltar er britisk og samstundes ikkje britisk. Det er veldig mykje spansk å høyra rundt om, noko som ikkje er så rart då dei fleste gibraltarianarar er tospråklege og at det er ein del som dagpendlar inn frå Spania. Overalt ser du typiske britiske kjenneteikn som dei raude telefonboksane og dei raude postkassene. Samstundes ser du palmer rundt deg og vêret er ikkje som på dei britiske øyene. Det var frykteleg stas å få koma inn i naturreservatet gratis fordi portvoktaren kjente meg att frå dagen før og hjelpa med klokkereima var òg gratis. Folk er tydelegvis storsinna og venlege! Om det var noko som overraska meg negativt så var det biltrafikken. Det er 30 000 fastbuande i Gibraltar, men trafikkstøyen og mengda biler er heilt infernalsk. På toppen av det heile kjem lyden av husbygging og frå verftet i byen. Det er få plasser i Gibraltar det er stille. Kan hende har eg budd for lenge i Aust-Finnmark! Denne gongen hadde eg fire netter. Det er nok kanskje éi for mykje for min del, men eg hadde lagt inn ein eventuell dagstur til Tanger i Marokko, eller eventuelt til ein annan stad, så eigentleg var det greitt med ein heil ettermiddag og to heile dagar samt ein utfluktsdag. Med bilete frå sete 5F på BA493 på veg opp i lufta frå Gibraltar takkar eg for følgjet for denne gong!
Epilog For å tilfredsstilla @Eddie47 (og eventuelt andre): Det vart ingen klaff på Tinder denne gongen heller. Sånn sett kan det vel seiast at tittelen på reisebrevet vart ei klikkhore, men det visste eg ikkje på førehand! GIB lufthamn, Tinder-fritt...
Åh, det var så lite! Takk for at du tok deg bryet med å mysa på alle bokstavane i dette vetle skribleriet
Takk for at du var med på tur! Og så må eg få be audmjukt om orsaking for at det vart mindre 'juicy' innhald enn det du kanskje hadde håpa på... Kven veit, kanskje neste gong?
Som Severin Suveren spurte: -- Tør du stole på flaksen? Vel, kva anna skal eg lita på om ikkje hell og lukke? Godt skribleria mine skapar glede, triveleg det!
Eg trur du treng oppfrisking av trøndersken din neste gong du vitjar bartebyen, @Eddie47. I Trøndelag kan ordet "veit" bety både ei smal gate og ei jente. Om du les heile den femte posten på side 3 (den som begynner med busetnadar for 40 000 år sida) med dette i bakhovudet vil du kanskje sjå eit hint. Eller er det eg som gjer ei fjøyr til ti høns, @Kristian?
No skal eg vera eit forbanna irriterande petimeter her: ei veit (smal gate), ei veitj (kvinnfolk). Og veitjer er ikkje noko for meg! Ikkje umogleg