Godt å se du nyter ferielivet Ser ut som en spennende by og land, fascinerende hvor svært det presidentpalasset er! Nyt turen videre
Tysdag i Romania I dag vakna eg ikkje før klokka kvart på ti, så eg innsåg at eg ikkje nådde frukostserveringa på hotellet. Så i ro og mak stod eg opp og tusla etter kvart ut døra for å jakta på litt frukost. Google kunne fortelja ein stad som hadde fått fem av fem stjerner, men då eg kom fram så synst eg at staden såg såpass tvilsam ut at eg heller gjekk vidare. På mi vandring ramla eg over Nullkilometersmerket, Kilometrul Zero, punktet i Romania som alle avstandar til resten av landet (og verda?) blir rekna utifrå:
Romania framstår som eit meir religiøst land enn Noreg. Ved den lokale kyrkja var det hundre meter kø for å koma inn i dag i ellevetida. På bussen var det ein person som mista noko på golvet. Personen, som plukka opp gjenstanden og gav denne tilbake til sin rettmessige eigar, korsa seg fleire gongar og uttalte det eg trur er ei lita bønn. Mange korsar seg berre dei går forbi kyrkjer — og dei er det mange av, og dei dukkar opp på uventa stader! I den vetle glipa mellom dei to bygningane på andre sida av gata på biletet ligg det ei kyrkje (som ein ikkje ser på biletet):
I Bukarest står gamalt og nytt side om side. Eg synst det gir byen særpreg. Sjølvsagt er noko falleferdig, men det kan jo skje i alle land der økonomien ikkje er knallgod. I stort synst eg den rumenske hovudstaden er i god stand, sjølv bileta eg har tatt ikkje nødvendigvis gir det inntrykket...
Den nasjonale militærforeininga, Cercul Militar Național, og Hotel Capitol skal få stå som døme på bygingar som er velhaldte, i alle falle eksteriørmessig.
Etter ein sein frukost tok eg turen til Therme. Frå sentrum tok eg buss 100 til flyplassen og så overgang til buss 442, ein tur på nesten 60 minutt (til tre lei, altså rundt 7,50 kr?). Denne gongen fann eg ut at bussane har betalingsautomat for Visa og Mastercard (og andre) ombord, så då slapp eg å tenkja på å finna ein billettautomat. Vel framme på Therme, eit termisk bad, eller varme kjelder, var det berre å få skifta om. Eg bomma nok på eit par rutiner der, det var slike omkledingsbåser som eg ikkje heilt såg eller skjønte kva var for noko først, men det ordna seg. Eg synst Therme var ganske så ålreit. Og det er tydeleg at ein er i Aust-Europa fordi dersom ein gjer noko feil, så får ein vaksenkjeft: — You need to sit on towel in sauna!!! — No phone in sauna! Forbidden!!! — You cant vape in the pool! Get out!!! Dette var berre eit lite knippe kommentarar folk fekk tredd over hovudet. Eg unngjekk kjeft, etter første påminninga om å ta med handduk for å sitja på i saunaen. På Therme er det fleire ulike badstuer med ulike temperaturar og luftfuktigheit. I tillegg er det mineralbad og ordinært bad — ute og inne. Temperaturen i vatnet er etter min smak veldig fin. Med maten, iskremen og alt kom 4,5 time i Therme på rundt 300 rumenske lei, altså 750 kroner? Det er ein pris eg synst er innanfor. Ikkje var det frykteleg mykje folk, heller.
Tag Aperitivo Bar vart staden der eg tok middagen. Det er ein av desse stadene i gamlebyen med innkastar. Kort sagt er dette sånn passe, absolutt ikkje ein stad som gir ei gastronomisk stor oppleving, men eg vart mett til 160 lei, altså cirka 400 kr?
Overnatting i Bukarest For denne turen til Romanias hovudstad hadde eg vald Old Town Boutique Hotel. Totalprisen kom på 5 000 kr for fire netter. Kortversjonen er at dette hotellet kan du heilt greitt halda deg unna. Hovudårsaka til at eg er misfornøgd er vel tredelt: — 1) Det er ingen dørterskel ut til gangen så det er ekstremt lytt for alle lydar frå ute i korridoren. Heldigvis var det lite folk her desse dagane og difor lite trafikk i gangane. — 2) Senga var slett ikkje av dei beste. Altså, eg har sove godt, men eg gjer nesten alltid det, men eg har kjent på fjærene i madrassen og eg trur ikkje det skal vera sånn. — 3) Frukostserveringa er langt under pari med magert utval. No skal det seiast, ein får det ein betalar for. Neste gong eg er i Bukarest skal eg nok gå opp i pris for eit betre rom, trur eg. På bileta ser ting ålreit ut, då:
Nokre korte føremiddagstimar i Romania Før avreise tilbake til gamlelandet tok eg turen innom Romanias nasjonalhistoriske museum, Muzeul Național de Istorie a României. Dette er ikkje eit kjempespennande museum, men eit par høgdepunkt dukka opp: Ei mellombels utstilling om korleis Molotov-Ribbentropp-pakta vart mottatt og følgjene av denne i landa som vart råka. I tillegg lærte eg at gullsmedkunsten i det som i dag er Romania er 7 000 år gamal. Ja, sju tusen år. Statuia Lupoaicei, ei gåve frå Roma
Heimreise frå OTP via AMS til OSL Bussturen frå Bukarest sentrum til flyplassen tok, som forventa, knappe tre kvarter. Dersom det skjer ei trafikkulukke eller er rushtrafikk kan eg sjå føre meg at det tar mykje meir tid! Her er det tidvis høg fart, tuting og filskifte over ei låg sko, men bussane er heldigvis ikkje så ville i bartane. Vel framme følte eg at eg var kome til ein byggeplass, som jo er korrekt:
I prioritetskøa hos KLM fekk eg henta ut ombordstigingskortet (fint å ha på papir, synst eg). Då eg spurde kvar hurtigkøa var fekk eg følgjande til svar: — We don't have that on this airport! Då så... — Vel, kor ille kan ei bermekø vera, tenkte eg med meg sjølv... Og rundt neste sving møtte dette synet meg, køa til tryggleikskontrollen:
Å koma seg gjennom den køa hadde eg trudd kom til å ta minst ein halvtime, men etter ti minutt var alt unnagjort og eg kunne leita opp loungen for å få ei forfriskning eller to. Rundt eit hjørne og bort ein korridor kom eg til eit skilt der det stod at loungen var stengt, så då titta eg på eit par fly i staden:
To gåter for å korta ventetida: — 1) Kvifor kan det hoppa frosk ut av bilen din dersom du fyller drivstoff i Romania? — 2) Kva er det beste med valutaen i Romania?
RH-BGB er her for å henta meg. Det synst eg er veldig koseleg. Det ligg an til mannskapsbytte for ein heil gjeng i KLM-uniformar står klare til å tusla ombord i denne rakkaren:
Eg veit du har sitra etter svara her: - 1) Fordi du fyller tanken hos Rompetrol! - 2) At du aldri går lei (valutaen heiter lei (det blir vel stava leu no til dags)! Blir humoren betre no...
Eg stod først i køa for prioritert ombordstiging og såg meg aldri tilbake. No er eg plassert trygt i 1A. Kapteinen lover ei flytid på 2:45. Bermen er på plass og straks demo. Neste stopp er AMS. Adjø til OTP:
I tilfelle @Eddie47 skulle dukke opp. Setet forble ledig hele flyturen. Dog, fra 1A var det ålreit utkikk
På denne flyginga serverte KLM ein god pasta. Rett nok var det på eit tidspunkt så kraftig turbulens at eg måtte halde i glasa slik at det ikkje skulle bli unødig søl, men så fort det var over så gjekk resten av flyginga greitt.
